|
|
|
 |
Özümdən xəbərsiz yaşa doluram |
|
|
|
Bilirəm geriyə dönməyəcəkdir,
Hələ də özümü aldadıram mən.
Görürəm, danışıb dinməyəcəkdir,
Özüm öz gözümü aldadıram mən.
Vəsfində bəstələr, nəğmələr yazır,
Gör nələr, gör nələr, gör nələr yazır…
Eşidənlər deyir bəxtəvər yazır,
Bilmirlər sözümü aldadıram mən.
Yanan bir od varsa, kömürdən gedir,
Çörəyin mayası xəmirdən gedir,
Saçıma yağan qar ömürdən gedir,
Qışımı, yazımı aldadıram mən.
Kədərli-kədərsiz yaşa doluram,
Bəhərli-bəhərsiz yaşa doluram,
Özümdən xəbərsiz yaşa doluram,
Yaşlanmış üzümü aldadıram mən.
Amansız bir ovçu salıb kəməndə,
Nə bir ruh buraxıb, nə can bədəndə,
Nə taqət qoyubdur, nə qərar məndə,
Səbiri, dözümü aldadıram mən.
Bitər bu qəm-kədər deyirəm bəlkə,
Bir şeylər düzələr deyirəm bəlkə,
Qəfildən yar gələr deyirəm bəlkə,
Öz alın yazımı aldadıram mən.
Uzanır bu yollar getdikcə insan,
Bir gün bir yerlərdə bitəcək güman,
Gedirəm, arxama dönüb baxmadan,
Yollarda izimi aldadıram mən.
22 Fevral 2025 - Richmond Hill, Ontario, Canada
Geri qayıt
|
|
 |
|
|
|
|
